କଟକ: କଟକ ଜିଲ୍ଲା ଜଗତପୁରର ଏକ ଘରୋଇ ମେଡିକାଲ୍ ଫାସିଲିଟିରେ ରୋଗୀଙ୍କ ମୃତ୍ୟୁକୁ ନେଇ ମଙ୍ଗଳବାର ଉତ୍ତେଜନା ପ୍ରକାଶ ପାଇଛି। ଚିକିତ୍ସାରେ ଅବହେଳା ଯୋଗୁଁ ରୋଗୀଙ୍କ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି।

ମୃତକଙ୍କ ପରିଚୟ ଭୁବନପୁର ଅଞ୍ଚଳର ୬୦ ବର୍ଷୀୟ ବିଜୟ ପଣ୍ଡା ବୋଲି ଜଣାପଡ଼ିଛି। ସୋମବାର ଛାତିରେ ଯନ୍ତ୍ରଣା ଅନୁଭବ କରିବା ପରେ ପରିବାର ଲୋକେ ତାଙ୍କୁ ନିକଟସ୍ଥ ଘରୋଇ ହସ୍ପିଟାଲକୁ ନେଇଥିଲେ। ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ICUରେ ଭର୍ତ୍ତି କରାଯାଇଥିଲା।

ପରିବାରର ଅଭିଯୋଗ

ବିଜୟଙ୍କ ପରିବାର ଲୋକେ ଅଭିଯୋଗ କରିଛନ୍ତି ଯେ, ରୋଗୀଙ୍କୁ ହସ୍ପିଟାଲ ନେଇ ପହଞ୍ଚିବା ସମୟରେ ସେଠାରେ ଡାକ୍ତର ଉପସ୍ଥିତ ନଥିଲେ। ଛାତିରେ ତୀବ୍ର ଯନ୍ତ୍ରଣା ଥିବା ସତ୍ତ୍ୱେ ତାଙ୍କ ସମସ୍ୟାକୁ ଗ୍ୟାସ୍ଜନିତ ବୋଲି କୁହାଯାଇଥିବା ପରିବାର ଅଭିଯୋଗ କରିଛି।

ପରିବାର ପକ୍ଷରୁ ତାଙ୍କୁ ଅନ୍ୟ ହସ୍ପିଟାଲକୁ ନେବା ପାଇଁ ଭେଣ୍ଟିଲେଟର ସୁବିଧା ଥିବା ଆମ୍ବୁଲାନ୍ସ ବ୍ୟବସ୍ଥା କରାଯାଇଥିଲା। ତେବେ ସେତେବେଳେ ରୋଗୀଙ୍କୁ ହୃଦ୍ଘାତ ହୋଇଥିବା ଏବଂ CPR ଦିଆଯାଉଥିବା ହସ୍ପିଟାଲ ପକ୍ଷରୁ କୁହାଯାଇଥିବା ପରିବାର ଦାବି କରିଛି।

ପରେ ICU ଭିତରକୁ ଯିବାକୁ ପରିବାରକୁ ଅନୁମତି ନଦିଆଯାଇଥିବା ନେଇ ମଧ୍ୟ ଅଭିଯୋଗ ହୋଇଛି। ଶେଷରେ ରୋଗୀଙ୍କ ମୃତ୍ୟୁ ହୋଇଥିଲା।

ହସ୍ପିଟାଲ ମାଲିକଙ୍କ ଅଭିଯୋଗ ଖଣ୍ଡନ

ଅନ୍ୟପଟେ ହସ୍ପିଟାଲ ମାଲିକ ସୁମିତ କୁମାର ଲେଙ୍କା ଚିକିତ୍ସାରେ କୌଣସି ଅବହେଳା ହୋଇଥିବା ଅଭିଯୋଗକୁ ଖଣ୍ଡନ କରିଛନ୍ତି। ତାଙ୍କ କହିବା ଅନୁସାରେ, ରୋଗୀ ହସ୍ପିଟାଲରେ ପହଞ୍ଚିବା ବେଳକୁ ତାଙ୍କ ଅକ୍ସିଜେନ୍ ସ୍ତର ବହୁତ କମିଯାଇଥିଲା। ତେଣୁ ଜୀବନ ରକ୍ଷାକୁ ପ୍ରାଥମିକତା ଦେଇ ତାଙ୍କୁ ତୁରନ୍ତ ICUକୁ ସ୍ଥାନାନ୍ତର କରାଯାଇଥିଲା।

ହସ୍ପିଟାଲ ମାଲିକଙ୍କ ଅନୁସାରେ, ICUରେ ଭର୍ତ୍ତି ହେବାର ପ୍ରାୟ ଦୁଇ ଘଣ୍ଟା ପରେ ରୋଗୀଙ୍କ ମୃତ୍ୟୁ ହୋଇଥିଲା। ରୋଗୀଙ୍କ ଅବସ୍ଥା ଗୁରୁତର ଥିବାରୁ ଚିକିତ୍ସାରେ ଅବହେଳା ହୋଇନଥିବା ସେ ସ୍ପଷ୍ଟ କରିଛନ୍ତି।

ଘଟଣାକୁ ନେଇ ପରିବାର ଲୋକଙ୍କ ଅଭିଯୋଗ ପରେ ହସ୍ପିଟାଲ ପରିସରରେ ଉତ୍ତେଜନା ଦେଖାଦେଇଥିଲା। ପରିସ୍ଥିତି ନିୟନ୍ତ୍ରଣ ଓ ଆଇନଶୃଙ୍ଖଳା ରକ୍ଷା ପାଇଁ ପୋଲିସ ମୁତୟନ କରାଯାଇଛି। ଘଟଣା ସମ୍ପର୍କରେ ତଦନ୍ତ ଜାରି ରହିଛି।