ଓଡ଼ିଶାରନବରଙ୍ଗପୁର ଜିଲ୍ଲାର ଉମରକୋଟସ୍ଥିତ ଏକ ସରକାରୀ ଆଶ୍ରମ ବିଦ୍ୟାଳୟରେ ରବିବାର ସକାଳେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ଅଷ୍ଟମ ଶ୍ରେଣୀରେ ପଢୁଥିବା ଜଣେ ଛାତ୍ରୀଙ୍କ ମୃତଦେହ ଛାତ୍ରାବାସ ନିକଟରେ ଥିବା ଏକ ଗଛରେ ଝୁଲନ୍ତା ଅବସ୍ଥାରେ ମିଳିଛି।

ମୃତ ଛାତ୍ରୀ ଉମରକୋଟ ବ୍ଲକ ଅନ୍ତର୍ଗତଡାଲଦାଲି ଗାଁର ବାସିନ୍ଦା ହୋଇଥିବାବେଳେ ସେ ସରକାରୀ ଆବାସିକ ବିଦ୍ୟାଳୟର ଛାତ୍ରାବାସରେ ରହୁଥିଲେ।

ପ୍ରାଥମିକ ସୂଚନା ଅନୁଯାୟୀ, ଶନିବାର ରାତିରେ ଛାତ୍ରାବାସରେ ରାତ୍ରିଭୋଜନ ପାଇଁ ସମସ୍ତ ଛାତ୍ରୀ ଏକାଠି ହୋଇଥିବାବେଳେ ତିନିଜଣ ଛାତ୍ରୀ ଅନୁପସ୍ଥିତ ଥିବା ଜଣାପଡ଼ିଥିଲା। ପରେ ବିଦ୍ୟାଳୟ କର୍ତ୍ତୃପକ୍ଷ ଦୁଇଜଣଙ୍କୁ ଖୋଜି ପାଇଥିଲେ, କିନ୍ତୁ ଜଣେ ଛାତ୍ରୀଙ୍କ କୌଣସି ସନ୍ଧାନ ମିଳିନଥିଲା।

ଏହାପରେ ବିଦ୍ୟାଳୟ ପରିସରରେ ଖୋଜାଖୋଜି କରାଯାଇଥିଲା। ସେହି ସମୟରେ ଛାତ୍ରାବାସ ନିକଟରେ ଥିବା ଏକ ଗଛରେ ଛାତ୍ରୀଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା। ଘଟଣା ସମ୍ପର୍କରେ ବିଦ୍ୟାଳୟର ପ୍ରଧାନଶିକ୍ଷକ ତୁରନ୍ତ ଉମରକୋଟ ପୋଲିସକୁ ସୂଚନା ଦେଇଥିଲେ।

ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ହସ୍ପିଟାଲକୁ ପଠାଇଛି। ପୋଲିସଅସ୍ୱାଭାବିକ ମୃତ୍ୟୁମାମଲା ରୁଜୁ କରି ଘଟଣାର ତଦନ୍ତ କରୁଛି। ମୃତ୍ୟୁର ପ୍ରକୃତ କାରଣ ଆତ୍ମହତ୍ୟା ନା ଅନ୍ୟ କୌଣସି ପରିସ୍ଥିତି ଏଥିପାଇଁ ଦାୟୀ, ସେନେଇ ତଦନ୍ତ ଜାରି ରହିଛି।

ଘଟଣା ପରେ ଜିଲ୍ଲା କଲ୍ୟାଣ ଅଧିକାରୀ ମଧ୍ୟ ବିଦ୍ୟାଳୟ ପରିଦର୍ଶନ କରିଥିଲେ। ତଦନ୍ତରେ ବିଦ୍ୟାଳୟ କିମ୍ବା ଛାତ୍ରାବାସ କର୍ତ୍ତୃପକ୍ଷଙ୍କ କୌଣସି ଅବହେଳା ସାମ୍ନାକୁ ଆସିଲେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଧିକାରୀମାନେ କହିଛନ୍ତି।

ଏହି ଘଟଣା ପରେ ଛାତ୍ରଛାତ୍ରୀ, ଅଭିଭାବକ ଓ ସ୍ଥାନୀୟ ଲୋକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି। ପୋଲିସ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଥିବାବେଳେ ତଦନ୍ତ ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ।