‘ବସ୍ ସ୍କାମ୍’ ନାମରେ ଏକ ନୂଆ ସାଇବର ଠକେଇ କର୍ପୋରେଟ୍ କମ୍ପାନୀ, CEO, CFO, ଚାର୍ଟାର୍ଡ ଆକାଉଣ୍ଟାଣ୍ଟ ଓ ଫାଇନାନ୍ସ ବିଭାଗର କର୍ମଚାରୀଙ୍କ ପାଇଁ ବଡ଼ ବିପଦ ସୃଷ୍ଟି କରିଛି। ଏହି ଠକେଇରେ ସାଇବର ଅପରାଧୀମାନେ ବରିଷ୍ଠ ଅଧିକାରୀଙ୍କ ପରିଚୟ ଦେଇ କମ୍ପାନୀର ଟଙ୍କା ଅନ୍ୟ ଆକାଉଣ୍ଟକୁ ପଠାଇବାକୁ କର୍ମଚାରୀଙ୍କୁ ପ୍ରଲୋଭିତ କରୁଛନ୍ତି।

ଅଧିକାରୀମାନଙ୍କ ଅନୁସାରେ, ଏହି ଠକେଇ ଏକ ସାଧାରଣ ଦେଖାଯାଉଥିବା ଆକାଉଣ୍ଟ ଷ୍ଟେଟମେଣ୍ଟ କିମ୍ବା ନିୟାମକ ସଂସ୍ଥାର ଡକ୍ୟୁମେଣ୍ଟ ଭଳି ମେସେଜ୍ରୁ ଆରମ୍ଭ ହୋଇପାରେ। ଏଥିରେ ZIP ଫାଇଲ୍ ଭିତରେ ମାଲୱେର ରହିଥାଏ। ଫାଇଲ୍ଟି କମ୍ପ୍ୟୁଟରରେ ଖୋଲିବା ପରେ ମାଲୱେର ସକ୍ରିୟ ହୋଇ ଡିଭାଇସ୍କୁ ନିୟନ୍ତ୍ରଣ କରିବା ସହିତ ସକ୍ରିୟ WhatsApp Web ସେସନ୍କୁ ମଧ୍ୟ ଟାର୍ଗେଟ୍ କରିପାରେ।

ହ୍ୟାକରମାନେ WhatsApp Webରେ ପ୍ରବେଶ କରିବା ପରେ ପୀଡ଼ିତଙ୍କ ପରିଚିତ କଣ୍ଟାକ୍ଟ ଓ ଗ୍ରୁପ୍କୁ ମେସେଜ୍ ପଠାଇପାରନ୍ତି। ଏହା ମାଧ୍ୟମରେ ଅନ୍ୟ କର୍ମଚାରୀଙ୍କୁ ମଧ୍ୟ ମାଲୱେର ଥିବା ଫାଇଲ୍ ଖୋଲିବାକୁ କୁହାଯାଏ। ପରିଚିତ ନମ୍ବରରୁ ମେସେଜ୍ ଆସୁଥିବାରୁ ଠକେଇଟି ସହଜରେ ଧରାପଡ଼ିନଥାଏ।

ଆକାଉଣ୍ଟ ଦଖଲ କରିବା ପରେ ଅପରାଧୀମାନେ CEO କିମ୍ବା ଅନ୍ୟ ବରିଷ୍ଠ ଅଧିକାରୀଙ୍କ ଭଳି ନିଜକୁ ପରିଚୟ ଦେଇ ଫାଇନାନ୍ସ ବିଭାଗର କର୍ମଚାରୀଙ୍କୁ ତୁରନ୍ତ ଟଙ୍କା ପଠାଇବାକୁ କହନ୍ତି। ‘ଏହା ଅତ୍ୟନ୍ତ ଜରୁରୀ’ ବୋଲି ଚାପ ସୃଷ୍ଟି କରାଯାଉଥିବାରୁ କର୍ମଚାରୀମାନେ ସ୍ୱତନ୍ତ୍ର ଯାଞ୍ଚ ନକରି ଟଙ୍କା ଟ୍ରାନ୍ସଫର କରିଦେଇପାରନ୍ତି।

ଏହି ଠକେଇ କେବଳ WhatsAppରେ ସୀମିତ ନୁହେଁ। ଇମେଲ୍, Microsoft Teams ଓ ସୋସିଆଲ ମିଡିଆ ମାଧ୍ୟମରେ ମଧ୍ୟ CEO କିମ୍ବା ବରିଷ୍ଠ ଅଧିକାରୀଙ୍କ ନାଁରେ ଏଭଳି ଠକେଇ କରାଯାଉଛି। ଦିଲ୍ଲୀ, ଗୁଜରାଟ, ମହାରାଷ୍ଟ୍ର ଓ ରାଜସ୍ଥାନ ସମେତ ବିଭିନ୍ନ ରାଜ୍ୟରୁ ଏପରି ଘଟଣାର ଅଭିଯୋଗ ଆସିଥିବା ଅଧିକାରୀମାନେ କହିଛନ୍ତି।

ଭାରତୀୟ ସାଇବର କ୍ରାଇମ୍ କୋଅର୍ଡିନେସନ୍ ସେଣ୍ଟର (I4C) ଏନେଇ ସତର୍କତା ଜାରି କରିଛି। SEBI ମଧ୍ୟ ମାଲୱେର ଥିବା ଫାଇଲ୍ ମାଧ୍ୟମରେ ଡିଭାଇସ୍ ଓ WhatsApp Web ଦଖଲ କରାଯାଇପାରୁଥିବା ନେଇ ସତର୍କ କରିଛି।

ଏଭଳି ଠକେଇରୁ ବଞ୍ଚିବା ପାଇଁ କମ୍ପାନୀଗୁଡ଼ିକୁ ଆଭ୍ୟନ୍ତରୀଣ ସୁରକ୍ଷା ବ୍ୟବସ୍ଥା ଓ ଟଙ୍କା ଟ୍ରାନ୍ସଫର ଯାଞ୍ଚ ପ୍ରକ୍ରିୟାକୁ ମଜବୁତ କରିବାକୁ ପରାମର୍ଶ ଦିଆଯାଇଛି। କେବଳ WhatsApp, ଇମେଲ୍ କିମ୍ବା ଅନ୍ୟ ମେସେଜିଂ ଆପ୍ରେ ମିଳିଥିବା ନିର୍ଦ୍ଦେଶ ଆଧାରରେ ଟଙ୍କା ପଠାଇବା ନୁହେଁ ବୋଲି ମଧ୍ୟ ସତର୍କ କରାଯାଇଛି।