ଭାରତୀୟ ଜନତା ପାର୍ଟି ନିଜ ସାଂଗଠନିକ ଢାଞ୍ଚାରେ ବଡ଼ ପରିବର୍ତ୍ତନ କରିଛି। ବୁଧବାର ଦଳ ପକ୍ଷରୁ ୨୮ଟି ରାଜ୍ୟ ଓ ୮ଟି କେନ୍ଦ୍ରଶାସିତ ଅଞ୍ଚଳ ପାଇଁ ପ୍ରଭାରୀ ଏବଂ ସହ-ପ୍ରଭାରୀଙ୍କ ନାଁ ଘୋଷଣା କରାଯାଇଛି। ନିଯୁକ୍ତିଗୁଡ଼ିକ ଦଳର ରାଷ୍ଟ୍ରୀୟ ଅଧ୍ୟକ୍ଷ ନୀତୀନ ନବୀନ ଘୋଷଣା କରିଛନ୍ତି ଏବଂ ସେଗୁଡ଼ିକ ତୁରନ୍ତ ଲାଗୁ ହେବ।

ଓଡ଼ିଶା ପାଇଁ ଡି. ପୁରନ୍ଦେଶ୍ୱରୀଙ୍କୁ ପ୍ରଭାରୀ ଏବଂ ଡ. ସ୍ୱଦେଶ ସିଂଙ୍କୁ ସହ-ପ୍ରଭାରୀ ନିଯୁକ୍ତ କରାଯାଇଛି। ଅନ୍ୟପଟେ ଓଡ଼ିଶାର ବିଜେପି ନେତା ତଥା ସାଂସଦ ବୈଜୟନ୍ତ ଜୟ ପଣ୍ଡାଙ୍କୁ ମହାରାଷ୍ଟ୍ର ପ୍ରଭାରୀ ଦାୟିତ୍ୱ ଦିଆଯାଇଛି। ମହାରାଷ୍ଟ୍ରରେ ତାଙ୍କ ସହ ଅମିତ ମାଲବ୍ୟ, ସଦାନନ୍ଦ ସେଠ ତନୱାଡେ ଓ କମଲଜିତ ସେହରାୱତ ସହ-ପ୍ରଭାରୀ ରହିବେ।

ଉତ୍ତର ପ୍ରଦେଶର ପ୍ରଭାରୀ ଭାବେ ବିନୋଦ ତାୱଡେଙ୍କୁ ଦାୟିତ୍ୱ ମିଳିଥିବାବେଳେ ଜଗଦୀଶ ପଟେଲ, ମେଘା କୁଲକର୍ଣ୍ଣୀ, ପ୍ରଦୀପ ବର୍ମା ଓ ଅନନ୍ତ ଓଝା ସହ-ପ୍ରଭାରୀ ହେବେ। ହରିଶ ଦ୍ୱିବେଦୀଙ୍କୁ ବିହାର ଓ କର୍ଣ୍ଣାଟକ, ସ୍ମୃତି ଇରାନୀଙ୍କୁ ଛତିଶଗଡ଼ ଓ ହରିୟାଣା, ରାମ ମାଧବଙ୍କୁ ତାମିଲନାଡୁ ଓ ଉତ୍ତରାଖଣ୍ଡ ଏବଂ ସୁନୀଲ ବଂଶଲଙ୍କୁ ତେଲଙ୍ଗାନା ଓ ପଶ୍ଚିମବଙ୍ଗର ଦାୟିତ୍ୱ ଦିଆଯାଇଛି।

ଅନ୍ୟ ନିଯୁକ୍ତି ମଧ୍ୟରେ ତରୁଣ ଚୁଗ୍ଙ୍କୁ ଗୁଜରାଟ, ଶ୍ରୀକାନ୍ତ ଶର୍ମାଙ୍କୁ ହିମାଚଳ ପ୍ରଦେଶ, ସତୀଶ ପୁନିଆଙ୍କୁ ଜମ୍ମୁ-କଶ୍ମୀର ଓ ପଞ୍ଜାବ, ବିପ୍ଳବ କୁମାର ଦେବଙ୍କୁ ମଧ୍ୟପ୍ରଦେଶ ଏବଂ ସଞ୍ଜୟ ଭାଟିଆଙ୍କୁ ରାଜସ୍ଥାନର ପ୍ରଭାରୀ କରାଯାଇଛି।

ଉତ୍ତର-ପୂର୍ବ ରାଜ୍ୟଗୁଡ଼ିକରେ ମଧ୍ୟ ନୂଆ ଦାୟିତ୍ୱ ବଣ୍ଟନ ହୋଇଛି। ମଙ୍ଗଳ ପାଣ୍ଡେଙ୍କୁ ଆସାମ, ଦେବେଶ କୁମାରଙ୍କୁ ଅରୁଣାଚଳ ପ୍ରଦେଶ, କନାଦ ପୁରକାୟସ୍ଥଙ୍କୁ ମେଘାଳୟ, ରାଜଦୀପ ରାୟଙ୍କୁ ମଣିପୁର, ଭାଗବତ କରାଡଙ୍କୁ ମିଜୋରାମ, ଅନିଲ ଆଣ୍ଟୋନିଙ୍କୁ ନାଗାଲାଣ୍ଡ ଏବଂ ମୃଗାଙ୍କ ଦେବ ବର୍ମନଙ୍କୁ ତ୍ରିପୁରାର ପ୍ରଭାରୀ କରାଯାଇଛି।