ରାଜଧାନୀ ଭୁବନେଶ୍ୱରରେ ବିହାରୀ ଲାଲ ସ୍ପୋର୍ଟସ ଟ୍ରଷ୍ଟର ବାର୍ଷିକ ଉତ୍ସବ ଆଡମ୍ବରପୂର୍ଣ୍ଣ ଭାବେ ପାଳିତ ହୋଇଛି। ସ୍ଥାନୀୟ ପୋଖରୀପୁଟ ସ୍ଥିତ ପାର୍କ ଲ୍ୟାଣ୍ଡ ରିସର୍ଟରେ ଆୟୋଜିତ ଏହି କାର୍ଯ୍ୟକ୍ରମରେ ରାଜ୍ୟର ପ୍ରତିଭାବାନ ଓ ଉଦୀୟମାନ କ୍ରୀଡ଼ାବିତ୍‌ମାନଙ୍କୁ ସମ୍ମାନିତ କରାଯାଇଥିଲା।

ବିଶେଷକରି ୧୬ ବର୍ଷରୁ କମ୍ ବୟସ ବର୍ଗର କୁନି କ୍ରିକେଟର୍ମାନଙ୍କୁ ମାନପତ୍ର ଓ ଟ୍ରଫି ପ୍ରଦାନ କରାଯାଇ ସେମାନଙ୍କ ଉତ୍କୃଷ୍ଟ ପ୍ରଦର୍ଶନକୁ ସ୍ୱୀକୃତି ଦିଆଯାଇଥିଲା। ଛୋଟ ବୟସରୁ ଏଭଳି ପ୍ରୋତ୍ସାହନ ମିଳିଲେ ଖେଳାଳିଙ୍କ ମନୋବଳ ବଢ଼ିବା ସହ ଭବିଷ୍ୟତରେ ସେମାନେ ରାଜ୍ୟ ଓ ଦେଶ ପାଇଁ ସଫଳତା ଆଣିପାରିବେ ବୋଲି ଅତିଥିମାନେ ମତ ପ୍ରକାଶ କରିଥିଲେ।

କାର୍ଯ୍ୟକ୍ରମରେ ଟ୍ରଷ୍ଟର ଅଧ୍ୟକ୍ଷ ଅକ୍ଷୟ ଜେନା କହିଥିଲେ ଯେ, ଆଗାମୀ ଦିନରେ କ୍ରୀଡ଼ା କ୍ଷେତ୍ରରେ ଉନ୍ନତି ପାଇଁ ଟ୍ରଷ୍ଟ ପକ୍ଷରୁ ଅଧିକ ପଦକ୍ଷେପ ନିଆଯିବ। ବିଭିନ୍ନ କ୍ରୀଡ଼ାରେ ଉଲ୍ଲେଖନୀୟ ପ୍ରଦର୍ଶନ କରୁଥିବା ପ୍ରତିଭାବାନ ଖେଳାଳିମାନଙ୍କୁ ଆର୍ଥିକ ସହାୟତା ସହ ଆବଶ୍ୟକ ସମସ୍ତ ସହଯୋଗ ଯୋଗାଇ ଦିଆଯିବ ବୋଲି ସେ ଘୋଷଣା କରିଥିଲେ।

ଏହି ଅବସରରେ ପୂର୍ବତନ କ୍ରିକେଟର୍ ରଶ୍ମିରଞ୍ଜନ ପରିଡ଼ା, ଦୀପକ ମଙ୍ଗରାଜ, ପ୍ରଶିକ୍ଷକ କ୍ଷୀରୋଦ ବେହେରାଙ୍କ ସମେତ ମନୋଜ ବିଶ୍ୱାଳ, ତୋଫାନ ସାମନ୍ତରାୟ ଓ କାଜଲ ବଳିୟାରସିଂ ପ୍ରମୁଖ ଯୋଗଦେଇ ଯୁବ ଖେଳାଳିମାନଙ୍କୁ ପ୍ରେରଣା ଓ ମାର୍ଗଦର୍ଶନ ଦେଇଥିଲେ।