ପାଟଣା: ବିହାରର ବୈଶାଳୀ ଜିଲ୍ଲାରେ ନିର୍ମାଣାଧୀନ ପୋଲ ଉପରେ ଘଟିଛି ବଡ଼ ଅଘଟଣ। ଭାରତମାଳା ପ୍ରକଳ୍ପ ଅଧୀନରେ ପାଟଣାରୁ ବେତିଆକୁ ସଂଯୋଗ କରୁଥିବା ଏନ୍‌ଏଚ୍‌-୧୩୯W ଚାରିଥାକିଆ ରାସ୍ତା ନିର୍ମାଣ ସମୟରେ ଜଲାଲପୁର ଗାଁର ସତୀସ୍ଥାନ ନିକଟରେ ଏକ ଭାରୀ ଲଞ୍ଚର ହଠାତ୍‌ ତଳକୁ ଖସିପଡ଼ିଛି। ଏହି ଘଟଣାରେ ୭ ଜଣ ଶ୍ରମିକ ଆହତ ହୋଇଛନ୍ତି।

ସୂଚନା ଅନୁଯାୟୀ, ନିର୍ମାଣାଧୀନ ପୋଲ ଉପରେ ଲଞ୍ଚରକୁ ସ୍ଥାନାନ୍ତର କରାଯାଉଥିଲା। ଏହି ସମୟରେ ଲଞ୍ଚରର ଫ୍ରଣ୍ଟ ସପୋର୍ଟ ହଠାତ୍‌ ଫେଲ୍‌ ହୋଇଯିବାରୁ ଏହା ତଳକୁ ଖସିପଡ଼ିଥିବା ଆହତ ଶ୍ରମିକମାନେ କହିଛନ୍ତି।

୨ ଘଣ୍ଟା ପରେ ଉଦ୍ଧାର ହେଲେ ଶ୍ରମିକ

ଦୁର୍ଘଟଣା ପରେ ଜଣେ ଶ୍ରମିକ ଲଞ୍ଚର ତଳେ ଫସି ରହିଥିଲେ। ପ୍ରାୟ ୨ ଘଣ୍ଟାର କଠିନ ଉଦ୍ୟମ ପରେ ତାଙ୍କୁ ଉଦ୍ଧାର କରାଯାଇଥିଲା। ଆହତ ଶ୍ରମିକମାନଙ୍କୁ ପ୍ରଥମେ ଲାଲଗଞ୍ଜ ରେଫରାଲ୍‌ ହସ୍ପିଟାଲକୁ ନିଆଯାଇଥିଲା। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ଗୁରୁତର ଥିବାରୁ ଉନ୍ନତ ଚିକିତ୍ସା ପାଇଁ ଅନ୍ୟତ୍ର ପଠାଯାଇଥିବା ଜଣାପଡ଼ିଛି। ଅନ୍ୟ ଆହତଙ୍କ ଅବସ୍ଥା ବିପଦମୁକ୍ତ ଥିବା କୁହାଯାଇଛି।

ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ଼ ଜମିଥିଲା। ନିର୍ମାଣକାରୀ ସଂସ୍ଥା ବିରୋଧରେ ଗ୍ରାମବାସୀ ଗୁରୁତର ଅବହେଳାର ଅଭିଯୋଗ ଆଣିଛନ୍ତି। ଘଟଣା ପରେ କମ୍ପାନୀର କିଛି ଅଧିକାରୀ ଓ ଇଞ୍ଜିନିୟର ଘଟଣାସ୍ଥଳ ଛାଡ଼ି ଚାଲିଯାଇଥିବା ନେଇ ମଧ୍ୟ ଅଭିଯୋଗ ହୋଇଛି। ତେବେ ଏହି ଅଭିଯୋଗଗୁଡ଼ିକର ସ୍ୱତନ୍ତ୍ର ପୁଷ୍ଟି ହୋଇନାହିଁ।

ଘଟଣାସ୍ଥଳରେ ଆମ୍ବୁଲାନ୍ସ ଓ ଜରୁରୀକାଳୀନ ସୁରକ୍ଷା ବ୍ୟବସ୍ଥା ନଥିବା ନେଇ ମଧ୍ୟ ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି। ଏକଲବ୍ୟ କନଷ୍ଟ୍ରକ୍ସନ୍‌ କମ୍ପାନୀ ଏହି ନିର୍ମାଣ କାମ କରୁଥିବା ଜଣାପଡ଼ିଛି।

NHAI ଦେଲା ସ୍ପଷ୍ଟୀକରଣ

ଅନ୍ୟପଟେ ଘଟଣାକୁ ନେଇ NHAI ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ଲଞ୍ଚରକୁ ସ୍ଥାନାନ୍ତର କରାଯାଉଥିବା ସମୟରେ ଏହି ଅଘଟଣ ଘଟିଥିବା NHAI କହିଛି। ଏହି ଘଟଣାରେ ମୁଖ୍ୟ ପୋଲ ଢାଞ୍ଚାର କୌଣସି କ୍ଷତି ହୋଇନଥିବା ପ୍ରାଧିକରଣ ସ୍ପଷ୍ଟ କରିଛି।

NHAIର ବୟାନ ଅନୁଯାୟୀ, ଘଟଣାସ୍ଥଳରେ ଥିବା ୪ ଜଣ ଶ୍ରମିକ ଆହତ ହୋଇଥିଲେ ଏବଂ ସେମାନଙ୍କୁ ତୁରନ୍ତ ନିକଟସ୍ଥ ହସ୍ପିଟାଲକୁ ନିଆଯାଇଥିଲା। ପ୍ରକଳ୍ପ ଟିମ୍‌ ଆହତଙ୍କ ସ୍ୱାସ୍ଥ୍ୟ ଉପରେ ନଜର ରଖିଥିବା ମଧ୍ୟ କୁହାଯାଇଛି।

ଭବିଷ୍ୟତରେ ଏଭଳି ଘଟଣା ଯେପରି ନଘଟେ, ସେଥିପାଇଁ ନିର୍ମାଣସ୍ଥଳର ସୁରକ୍ଷା ମାନଦଣ୍ଡର ସମୀକ୍ଷା କରାଯାଉଥିବା NHAI କହିଛି। ନିର୍ମାଣର ଗୁଣବତ୍ତା, ଶ୍ରମିକଙ୍କ ସୁରକ୍ଷା ଓ ପ୍ରକଳ୍ପକୁ ଧାର୍ଯ୍ୟ ସମୟରେ ଶେଷ କରିବା ପାଇଁ NHAI ପ୍ରତିବଦ୍ଧ ବୋଲି କୁହାଯାଇଛି।