ବିହାରରେ ବନ୍ୟା ସ୍ଥିତି ଗମ୍ଭୀର ହୋଇପଡ଼ିଛି। ସରକାରୀ ବୁଲେଟିନ୍ ଅନୁସାରେ, ରାଜ୍ୟର ୧୧ଟି ଜିଲ୍ଲାରେ ପ୍ରାୟ୧୦.୨୬ ଲକ୍ଷ ଲୋକବନ୍ୟା ପ୍ରଭାବିତ ହୋଇଛନ୍ତି। ୫୦ଟି ବ୍ଲକ୍ ଓ ୨୦୧ଟି ଗ୍ରାମ ପଞ୍ଚାୟତ ମଧ୍ୟ ବନ୍ୟାରେ ପ୍ରଭାବିତ ହୋଇଛି।

ଭାରୀ ବର୍ଷା ପରେ ଶନିବାର ସକାଳେ ପାଟନାର ଗାନ୍ଧୀ ଘାଟରେ ଗଙ୍ଗା ନଦୀର ଜଳସ୍ତର ସର୍ବୋଚ୍ଚ ବନ୍ୟାସ୍ତରକୁ ଅତିକ୍ରମ କରିଛି। ସକାଳ ୧୦ଟାରେ ଜଳସ୍ତର ୫୦.୫୩ ମିଟରରେ ପହଞ୍ଚିଥିଲା, ଯାହା ସର୍ବୋଚ୍ଚ ବନ୍ୟାସ୍ତରଠାରୁ ୧ ସେଣ୍ଟିମିଟର ଅଧିକ। ଏହା ପୂର୍ବରୁ ୨୦୧୬ ଅଗଷ୍ଟ ୨୧ରେ ୫୦.୫୨ ମିଟର ଜଳସ୍ତର ରେକର୍ଡ ହୋଇଥିଲା।

ଜଳସମ୍ପଦ ବିଭାଗର ପୂର୍ବାନୁମାନ ଅନୁସାରେ, ରବିବାର ସକାଳ ୮ଟା ସୁଦ୍ଧା ଗାନ୍ଧୀ ଘାଟରେ ଗଙ୍ଗାର ଜଳସ୍ତର ୫୦.୬୨ ମିଟରକୁ ବଢ଼ିପାରେ। ଏଥିପାଇଁ ନଦୀ ନିକଟବର୍ତ୍ତୀ ଓ ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ସତର୍କ ରହିବାକୁ କୁହାଯାଇଛି।

ପାଟନାର ପାଣ୍ଡାରକରେ ମଧ୍ୟ ଗଙ୍ଗାର ଜଳସ୍ତର ପୂର୍ବ ସର୍ବୋଚ୍ଚ ବନ୍ୟାସ୍ତରଠାରୁ ଉପରେ ରହିଛି। ଏହା ସହ ଗଣ୍ଡକ, କୋସି, ବୁଢ଼ି ଗଣ୍ଡକ, ଘାଘରା ଓ ପୁନପୁନ୍ ସମେତ ଅନେକ ନଦୀ ବିଭିନ୍ନ ସ୍ଥାନରେ ବିପଦ ସଙ୍କେତ ଉପରେ ପ୍ରବାହିତ ହେଉଛି।

ବନ୍ୟା ପ୍ରଭାବିତ ଜିଲ୍ଲାଗୁଡ଼ିକ ହେଲା ପାଟନା, ଭୋଜପୁର, ସାରଣ, ବୈଶାଳୀ, ଭାଗଲପୁର, ବେଗୁସରାଇ, ବକ୍ସର, ସମସ୍ତିପୁର, ମୁଙ୍ଗେର, କଟିହାର ଓ ଅରରିଆ। ସମ୍ଭାବ୍ୟ ଜରୁରୀ ପରିସ୍ଥିତି ପାଇଁ ନଦୀବନ୍ଧ ନିକଟ ଅଞ୍ଚଳରେ ଲଗାତାର ପାଟ୍ରୋଲିଂ ଏବଂ ଲୋକଙ୍କୁ ସତର୍କ କରିବାକୁ ନିର୍ଦ୍ଦେଶ ଦିଆଯାଇଛି।

ବିହାର ସରକାର କହିଛି ଯେ ସେପ୍ଟେମ୍ବରରେ ଏପର୍ଯ୍ୟନ୍ତ ରାଜ୍ୟରେ ୬୦.୮ ମିମି ବର୍ଷା ହୋଇଛି, ଯାହା ସ୍ୱାଭାବିକ ଠାରୁ ୬୯ ପ୍ରତିଶତ ଅଧିକ। ବିହାର ଓ ପଡ଼ୋଶୀ ନେପାଳରେ ଭାରୀ ବର୍ଷା ଯୋଗୁଁ ନଦୀଗୁଡ଼ିକର ଜଳସ୍ତର ବଢ଼ିଥିବା କୁହାଯାଇଛି।

ବନ୍ୟା ପ୍ରଭାବିତ ଲୋକଙ୍କ ପାଇଁ ବିଭିନ୍ନ ଜିଲ୍ଲାରେ୩୮ଟି କମ୍ୟୁନିଟି କିଚେନ୍ଚାଲୁ କରାଯାଇଛି। ପ୍ରାୟ ୧୨,୩୦୦ ପଲିଥିନ୍ ସିଟ୍ ଓ ୨,୨୫୦ ଡ୍ରାଏ ରାସନ୍ ପ୍ୟାକେଟ୍ ବଣ୍ଟନ କରାଯାଇଥିବା ବେଳେ ଉଦ୍ଧାର ଓ ଯାତାୟାତ ପାଇଁ ୮୫୮ଟି ଡଙ୍ଗା ବ୍ୟବହାର କରାଯାଉଛି। ଏହାସହ ୨୭ଟି SDRF ଟିମ୍ ଓ ୭ଟି NDRF ଟିମ୍ ମୁତୟନ କରାଯାଇଛି।

ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ବନ୍ୟା ପ୍ରଭାବିତ ଅଞ୍ଚଳକୁ ଯାଇ ସ୍ଥିତିର ସମୀକ୍ଷା କରିବା ସହ ରିଲିଫ୍ ଓ ଉଦ୍ଧାର କାର୍ଯ୍ୟର ତଦାରଖ କରିବାକୁ ମନ୍ତ୍ରୀ ଓ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ପାଟନା ମ୍ୟୁନିସିପାଲ୍ କର୍ପୋରେସନ୍, ଜିଲ୍ଲା ପ୍ରଶାସନ ଓ ଜଳସମ୍ପଦ ବିଭାଗକୁ ମଧ୍ୟ ହାଇ ଆଲର୍ଟରେ ରହିବାକୁ କୁହାଯାଇଛି।