ରାଜଧାନୀ ଭୁବନେଶ୍ୱରରେ ବଢ଼ୁଛି ହିଂସାକାଣ୍ଡ । କଥା କଥାରେ ଘଟୁଛି ହତ୍ୟା ଭଳି ସଙ୍ଗିନ ଅପରାଧ। କେଉଁଠି ବନ୍ଧୁକରୁ ଗୁଳି ଫୁଟୁଛି ତ ଆଉ କେଉଁଠି ପଥରରେ ଛେଚି ଜୀବନ ନେଇଯାଉଛନ୍ତି ଦୁର୍ବୃତ୍ତ। ଗତ ୪ ଦିନ ମଧ୍ୟରେ ରାଜଧାନୀରେ ୫ଟି ହତ୍ୟାକାଣ୍ଡ ଘଟିଥିବା ଖବର ସାମ୍ନାକୁ ଆସିବା ପରେ ସାଧାରଣ ଲୋକଙ୍କ ମଧ୍ୟରେ ଭୟ ଓ ଉଦ୍‌ବେଗ ବଢ଼ିଛି।

ବୋମିଖାଲରେ ଗୁଳିମାଡ଼, ଶଳାଙ୍କ ମୃତ୍ୟୁ

ଶୁକ୍ରବାର ବିଳମ୍ବିତ ରାତିରେ ଭୁବନେଶ୍ୱରର ବୋମିଖାଲ ଅଞ୍ଚଳରେ ଘଟିଛି ଗୁଳିକାଣ୍ଡ । ପାରିବାରିକ କଳହକୁ କେନ୍ଦ୍ର କରି ଭିଣେଇଙ୍କ ଗୁଳିମାଡ଼ରେ ଶଳା ସୋନୁ ନାୟକଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି।

ସୂଚନା ଅନୁସାରେ, କିଛିଦିନ ପୂର୍ବରୁ ଭିଣେଇ ଓ ଶଳାଙ୍କ ମଧ୍ୟରେ କୌଣସି କାରଣକୁ ନେଇ ଗଣ୍ଡଗୋଳ ହୋଇଥିଲା। ଏହାକୁ ନେଇ ଗତକାଲି ରାତିରେ ପୁଣି ଉତ୍ତେଜନା ବଢ଼ିଥିଲା। ଏହି ସମୟରେ ଅଭିଯୁକ୍ତ ଭିଣେଇ ବନ୍ଧୁକ ବାହାର କରି ସୋନୁଙ୍କ ଉପରକୁ ଗୁଳି ଚଳାଇଥିବା ଅଭିଯୋଗ ହୋଇଛି। ଗୁଳିମାଡ଼ରେ ସୋନୁଙ୍କ ମୃତ୍ୟୁ ହୋଇଥିବା କୁହାଯାଉଛି।

ଘଟଣା ପରେ ପୁଲିସକୁ ଭ୍ରମିତ କରିବା ପାଇଁ ପରିବାର ପକ୍ଷରୁ ଘଟଣାକୁ ଅନ୍ୟ ରୂପ ଦେବାକୁ ଉଦ୍ୟମ ହୋଇଥିବା ଅଭିଯୋଗ ମଧ୍ୟ ରହିଛି। ଏହି ଘଟଣାରେ ଲକ୍ଷ୍ମୀସାଗର ଥାନା ପୁଲିସ ୪ ଜଣଙ୍କୁ ଗିରଫ କରି ତଦନ୍ତ ଚଳାଇଛି। ଅନ୍ୟପଟେ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ବିଭିନ୍ନ ପ୍ରମାଣ ସଂଗ୍ରହ କରିଛି।

ତାରିଣୀ ବସ୍ତିରେ ପଥରରେ ଛେଚି ହତ୍ୟା

ସେହିପରି ମଞ୍ଚେଶ୍ୱର ଥାନା ଅଧୀନ ତାରିଣୀ ବସ୍ତିରେ ଆଉ ଏକ ହତ୍ୟାକାଣ୍ଡ ଘଟିଛି। ପରକୀୟା ସମ୍ପର୍କକୁ ସନ୍ଦେହ କରି ଗଞ୍ଜାମ ଜିଲ୍ଲାର ଜଣେ ଯୁବକଙ୍କୁ ପଥରରେ ଛେଚି ହତ୍ୟା କରାଯାଇଥିବା ଅଭିଯୋଗ ରହିଛି।

ସୂଚନା ଅନୁସାରେ, ବସ୍ତିରେ ରହୁଥିବା ଜଣେ ନେପାଳୀ ଦମ୍ପତିଙ୍କ ମଧ୍ୟରେ ଏହି ସମ୍ପର୍କକୁ ନେଇ ବିବାଦ ରହିଥିଲା। ମହିଳାଙ୍କ ସହ ପଡ଼ୋଶୀ ଘରେ ରହୁଥିବା ଗଞ୍ଜାମର ଜଣେ ଯୁବକଙ୍କ ଅନୈତିକ ସମ୍ପର୍କ ଥିବା ତାଙ୍କ ସ୍ୱାମୀ ସନ୍ଦେହ କରୁଥିଲେ। ଏହି ସନ୍ଦେହକୁ କେନ୍ଦ୍ର କରି ଯୁବକଙ୍କୁ ପଥରରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି।

ଘଟଣାରେ ମଞ୍ଚେଶ୍ୱର ଥାନା ପୁଲିସ ଜଣଙ୍କୁ ଅଟକ ରଖି ପଚରାଉଚରା କରୁଛି। ସାଇଣ୍ଟିଫିକ୍ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି।

୪ ଦିନରେ ୫ ହତ୍ୟାକାଣ୍ଡ, ଚିନ୍ତାରେ ରାଜଧାନୀବାସୀ

ଗତ କିଛିଦିନ ମଧ୍ୟରେ ଭୁବନେଶ୍ୱରରେ ଘଟିଥିବା ହତ୍ୟାକାଣ୍ଡର ଘଟଣାକ୍ରମ ଚିନ୍ତା ବଢ଼ାଇଛି।

• ଶୁକ୍ରବାର: ବୋମିଖାଲରେ ଗୁଳିମାଡ଼ରେ ସୋନୁ ନାୟକଙ୍କ ମୃତ୍ୟୁ।

• ଶୁକ୍ରବାର: ମଞ୍ଚେଶ୍ୱର ତାରିଣୀ ବସ୍ତିରେ ଯୁବକଙ୍କୁ ପଥରରେ ଛେଚି ହତ୍ୟା ଅଭିଯୋଗ ।

• ଗୁରୁବାର: ଶିଶୁପାଳଗଡ଼ରେ ଗୁଳିକାଣ୍ଡ । ଯୁବକଙ୍କୁ ହତ୍ୟା ପରେ ଗଙ୍ଗୁଆ ନାଳରେ ବନ୍ଧୁକ ଫିଙ୍ଗାଯାଇଥିବା ଖବର ।

• ବୁଧବାର: କେଳୁଚରଣ ପାର୍କ ନିକଟରେ ଜଣେ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ।

• ବୁଧବାର: ଲକ୍ଷ୍ମୀସାଗରର ବୁଦ୍ଧନଗରରେ ଜଣେ ବରିଷ୍ଠ ନାଗରିକଙ୍କୁ ହତ୍ୟା ଅଭିଯୋଗ। ତାଙ୍କ ହାତଗୋଡ଼ ବାନ୍ଧି ହତ୍ୟା କରାଯାଇଥିବା ଜଣାପଡ଼ିଛି। ଏହି ଘଟଣାରେ କେୟାରଟେକର ବଳଭଦ୍ର ମହାରଣାଙ୍କ ସମ୍ପୃକ୍ତି ଥିବା ଅଭିଯୋଗ ହୋଇଛି।

ଲଗାତାର ହତ୍ୟାକାଣ୍ଡ ଓ ହିଂସାକାଣ୍ଡ ରାଜଧାନୀର ସୁରକ୍ଷା ବ୍ୟବସ୍ଥାକୁ ନେଇ ଗମ୍ଭୀର ପ୍ରଶ୍ନ ସୃଷ୍ଟି କରିଛି। ଏହି ସମସ୍ତ ଘଟଣାର ପ୍ରକୃତ କାରଣ, ଅଭିଯୁକ୍ତଙ୍କ ସମ୍ପୃକ୍ତି ଏବଂ ଅପରାଧ ପଛର ରହସ୍ୟ ପୁଲିସ ତଦନ୍ତ ପରେ ସ୍ପଷ୍ଟ ହେବ ।