ରାଜ୍ୟରେ ଲଗାଣ ବର୍ଷା ଜାରି ରହିଥିବା ବେଳେ ବାଲେଶ୍ୱର ଜିଲ୍ଲାର ଅନେକ ଅଞ୍ଚଳରେ ଚାଷୀମାନେ ଗୁରୁତର କ୍ଷତିର ସମ୍ମୁଖୀନ ହୋଇଛନ୍ତି। ଖଇରା, ସିମୁଳିଆ ଓ ସୋର ବ୍ଲକ୍ର ବିଭିନ୍ନ ଅଞ୍ଚଳରେ ଲଗାତାର ବର୍ଷା ଓ ଜଳବନ୍ଦୀ ପରିସ୍ଥିତି ଯୋଗୁଁ ଧାନ ବିହନ ଓ ବିହନତଳା ନଷ୍ଟ ହୋଇଯାଇଛି।

ଖରିଫ ଋତୁରେ ଭଲ ଫସଲ ଆଶାରେ ଚାଷୀମାନେ ବହୁ ପରିଶ୍ରମ ଓ ଅର୍ଥ ବ୍ୟୟ କରି ବିହନତଳା ପ୍ରସ୍ତୁତ କରିଥିଲେ। କିନ୍ତୁ ଲଗାତାର ବର୍ଷାରେ ଚାଷଜମିରେ ପାଣି ଜମି ରହିବାରୁ ବିହନତଳା ପଚି ନଷ୍ଟ ହୋଇଯାଇଛି। ଫଳରେ ଅନେକ ଚାଷୀଙ୍କ ପାଖରେ ପୁଣିଥରେ ବିହନତଳା ପ୍ରସ୍ତୁତ କରିବା ପାଇଁ ପର୍ଯ୍ୟାପ୍ତ ବିହନ ମଧ୍ୟ ନାହିଁ।

ଏହି କ୍ଷତି ଯୋଗୁଁ ଚଳିତ ଖରିଫ ଚାଷ ବ୍ୟାପକ ଭାବେ ପ୍ରଭାବିତ ହେବାର ଆଶଙ୍କା ଦେଖାଦେଇଛି। ସମୟମଧ୍ୟରେ ଚାଷ ଆରମ୍ଭ ନହେଲେ ଫସଲ ଉତ୍ପାଦନ ଉପରେ ଏହାର ପ୍ରଭାବ ପଡ଼ିପାରେ ବୋଲି ଚାଷୀମାନେ କହିଛନ୍ତି।

ସ୍ଥାନୀୟ ଚାଷୀମାନଙ୍କ କହିବା ଅନୁଯାୟୀ, ବିହନତଳା ଉପରେ ପ୍ରାୟ ତିନି ଫୁଟରୁ ଅଧିକ ପାଣି ଜମି ରହିଛି। ଏପରି ପରିସ୍ଥିତିରେ ପୁଣିଥରେ ଚାଷ କରିବା ସମ୍ଭବ ନୁହେଁ। ସରକାର ବିହନ, ସାର ଓ କୀଟନାଶକ ଯୋଗାଇଦେଲେ ସେମାନେ ପୁନର୍ବାର ଚାଷ ଆରମ୍ଭ କରିପାରିବେ।

ଚାଷୀମାନେ ଆହୁରି କହିଛନ୍ତି ଯେ, ଏହି ଅଞ୍ଚଳରେ ଜଳ ନିଷ୍କାସନର ସ୍ଥାୟୀ ବ୍ୟବସ୍ଥା ନଥିବାରୁ ପ୍ରତିବର୍ଷ ବର୍ଷା ସମୟରେ ଏଭଳି ସମସ୍ୟା ଦେଖାଦେଉଛି। ନାଳ ସଂସ୍କାର ଏବଂ ନଦୀ ସହ ସଂଯୋଗ କରାଗଲେ ଏହାର ସ୍ଥାୟୀ ସମାଧାନ ହୋଇପାରିବ ବୋଲି ସେମାନେ ମତ ପ୍ରକାଶ କରିଛନ୍ତି।

ଚାଷୀମାନେ ରାଜ୍ୟ ସରକାରଙ୍କୁ ତୁରନ୍ତ କ୍ଷତିପୂରଣ, ବିହନ, ସାର ଓ ଅନ୍ୟାନ୍ୟ କୃଷି ସାମଗ୍ରୀ ଯୋଗାଇବା ସହ ଜଳ ନିଷ୍କାସନ ପାଇଁ ସ୍ଥାୟୀ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ତେବେ ଏହି ପ୍ରସଙ୍ଗରେ ସ୍ଥାନୀୟ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।