ବୁଲଗେରିଆର ଭବିଷ୍ୟଦ୍ରଷ୍ଟା ବାବା ଭେଙ୍ଗାଙ୍କ ନାମରେ ୨୦୨୭କୁ ନେଇ ଅନେକ ଚର୍ଚ୍ଚିତ ଭବିଷ୍ୟବାଣୀ ସାମ୍ନାକୁ ଆସିଛି। ତାଙ୍କ ଅନୁଗାମୀମାନେ ଦାବି କରନ୍ତି ଯେ ଭେଙ୍ଗାଙ୍କର ଭବିଷ୍ୟତ ଘଟଣା ଦେଖିବାର କ୍ଷମତା ଥିଲା। ତାଙ୍କ ନାମରେ କୋଭିଡ୍-୧୯, ୯/୧୧ ଆକ୍ରମଣ ଏବଂ ରାଜକୁମାରୀ ଡାଏନାଙ୍କ ମୃତ୍ୟୁ ଭଳି ଘଟଣାର ପୂର୍ବାନୁମାନ କରାଯାଇଥିବା ଦାବି ମଧ୍ୟ ରହିଛି।

ଏବେ ୨୦୨୭କୁ ନେଇ ଭେଙ୍ଗାଙ୍କ ନାମରେ ଯେଉଁ ଦାବିଗୁଡ଼ିକ ପ୍ରଚାରିତ ହେଉଛି, ସେଥିରେ ସବୁଠାରୁ ଚର୍ଚ୍ଚିତ ହେଉଛି ଏକ ଅଜଣା ରୋଗର ଆଶଙ୍କା। ଦାବି ଅନୁସାରେ, ୨୦୨୭ରେ ପୃଥିବୀରେ କୋଭିଡ୍-୧୯ ଭଳି ଏକ ନୂଆ ରୋଗ ବ୍ୟାପିପାରେ। ଏହା ଲୋକଙ୍କ ମଧ୍ୟରେ ବଡ଼ ଚିନ୍ତା ସୃଷ୍ଟି କରିବ ବୋଲି କୁହାଯାଉଛି।

ଏହା ସହ ଆଉ ଏକ ଅଜବ ଦାବି ହେଉଛି ‘ସୁପରହ୍ୟୁମାନ୍’ଙ୍କ ଜନ୍ମ। କୁହାଯାଉଛି, କୌଣସି ପରୀକ୍ଷଣ କିମ୍ବା ସଂକ୍ରମଣ ପରେ କିଛି ଲୋକଙ୍କ ମଧ୍ୟରେ ଅସାଧାରଣ ଶକ୍ତି ବିକଶିତ ହୋଇପାରେ। ଯଦିଓ ଏହି ଦାବିରେ ଏହି ଶକ୍ତିର ସ୍ୱରୂପ କ’ଣ ହେବ କିମ୍ବା ସେମାନେ କ’ଣ କରିପାରିବେ, ସେନେଇ କୌଣସି ସ୍ପଷ୍ଟ ବିବରଣୀ ନାହିଁ।

୨୦୨୬କୁ ନେଇ ମଧ୍ୟ ଅନେକ ଦାବି

ବିଭିନ୍ନ ରିପୋର୍ଟରେ ବାବା ଭେଙ୍ଗାଙ୍କ ନାମରେ ୨୦୨୬କୁ ନେଇ ମଧ୍ୟ ବିଶ୍ୱଯୁଦ୍ଧ, ଜଳବାୟୁ ପରିବର୍ତ୍ତନ, ଏଆଇ ଓ ପ୍ରଯୁକ୍ତିବିଦ୍ୟା ସମ୍ପର୍କିତ ବିପଦ ଭଳି ଦାବି ପ୍ରଚାରିତ ହୋଇଥିଲା। ମଧ୍ୟପ୍ରାଚ୍ୟରେ ଜାରି ଥିବା ସଂଘର୍ଷ ଏବଂ ବିଶ୍ୱର ବିଭିନ୍ନ ଭୂ-ରାଜନୈତିକ ଘଟଣାକୁ ଏହି ଭବିଷ୍ୟବାଣୀ ସହ ଯୋଡ଼ାଯାଇଥିଲା।

ବଡ଼ ଭୂମିକମ୍ପ ଏବଂ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପ୍ରଭାବ ବଢ଼ିବା ନେଇ ମଧ୍ୟ ଭେଙ୍ଗାଙ୍କ ନାମରେ ଦାବି ରହିଛି। ଏହା ସହ ଫ୍ରାନ୍ସର ପ୍ରସିଦ୍ଧ ଭବିଷ୍ୟଦ୍ରଷ୍ଟା ନୋଷ୍ଟ୍ରାଡମସ୍ଙ୍କ ନାମରେ ମଧ୍ୟ ସମାନ ପ୍ରକାରର ଭବିଷ୍ୟବାଣୀ ପ୍ରଚାରିତ ହୋଇଆସୁଛି।

ତେବେ ବାବା ଭେଙ୍ଗାଙ୍କ ନାମରେ ପ୍ରଚାରିତ ଏହି ଭବିଷ୍ୟବାଣୀଗୁଡ଼ିକର ଅଧିକାଂଶ ପାଇଁ ସ୍ପଷ୍ଟ ମୂଳ ଦଲିଲ କିମ୍ବା ତାଙ୍କ ନିଜ ଲିଖିତ ରେକର୍ଡ ଉପଲବ୍ଧ ନଥିବାରୁ ଏଗୁଡ଼ିକୁପ୍ରମାଣିତ ତଥ୍ୟ ଭାବେ ନୁହେଁ, ବରଂ ପ୍ରଚଳିତ ଦାବି ଓ ଭବିଷ୍ୟବାଣୀ ଭାବେ ଦେଖିବା ଉଚିତ।