ଦକ୍ଷିଣ ଭାରତୀୟ ସିନେମାର ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ଅନିରୁଦ୍ଧ ରବିଚନ୍ଦର ଓ ଆଇପିଏଲ୍ ଫ୍ରାଞ୍ଚାଇଜ୍ ସନରାଇଜର୍ସ ହାଇଦ୍ରାବାଦର ସିଇଓ କାବ୍ୟା ମାରନଙ୍କ ବିବାହକୁ ନେଇ ଗୁଜବ ପୁଣି ଥରେ ସୋସିଆଲ ମିଡିଆରେ ଜୋର ଧରିଛି।

ଏହି ଚର୍ଚ୍ଚାକୁ ନୂଆ ମୋଡ଼ ଦେଇଛନ୍ତି ଅନିରୁଦ୍ଧଙ୍କ ମାମୁଁ ଏବଂ ବରିଷ୍ଠ ଅଭିନେତା ୱାଇ.ଜି. ମହେନ୍ଦ୍ରନ୍। ଏକ ସାକ୍ଷାତ୍କାରରେ ସେ କହିଛନ୍ତି ଯେ ଅନିରୁଦ୍ଧ ଏକ ବଡ଼ ବିବାହ ଦିଗରେ ଆଗେଇ ଯାଉଛନ୍ତି। ଯେତେବେଳେ ତାଙ୍କୁ ଏହି ଖବର ସତ୍ୟ କି ବୋଲି ପଚରାଯାଇଥିଲା, ସେ କହିଥିଲେ ଯେ ତାଙ୍କୁ ମିଳିଥିବା ସୂଚନା ଅନୁସାରେ ବିବାହ ପ୍ରାୟ ନିଶ୍ଚିତ ଏବଂ ଅନିରୁଦ୍ଧ ଓ କାବ୍ୟା ଏକ ସୁନ୍ଦର ଯୋଡ଼ି।

ତେବେ ଏହି ବୟାନ ପରେ ସୋସିଆଲ ମିଡିଆରେ ନୂଆ ଚର୍ଚ୍ଚା ଆରମ୍ଭ ହୋଇଥିଲେ ମଧ୍ୟ, ଅନିରୁଦ୍ଧ ରବିଚନ୍ଦର କିମ୍ବା କାବ୍ୟା ମାରନ ଏପର୍ଯ୍ୟନ୍ତ ନିଜ ସମ୍ପର୍କ କିମ୍ବା ବିବାହକୁ ନେଇ କୌଣସି ଅଧିକୃତ ଘୋଷଣା କରିନାହାନ୍ତି।

ଗତ ବର୍ଷ ମଧ୍ୟ ସୋସିଆଲ ମିଡିଆରେ ଦୁହେଁ ଦୀର୍ଘଦିନ ଧରି ରିଲେସନ୍ଶିପ୍ରେ ଥିବା ଏବଂ ବିବାହ କରିବାକୁ ଯାଉଥିବା ନେଇ ଖବର ଭାଇରାଲ ହୋଇଥିଲା। ସେତେବେଳେ ଅନିରୁଦ୍ଧ ସୋସିଆଲ ମିଡିଆରେ ପୋଷ୍ଟ କରି ସେହି ଖବରକୁ ସମ୍ପୂର୍ଣ୍ଣ ଗୁଜବ ବୋଲି ଖଣ୍ଡନ କରିଥିଲେ।

କାବ୍ୟା ମାରନ ହେଉଛନ୍ତି ସନ୍ ଗ୍ରୁପ୍ ଚେୟାରମ୍ୟାନ୍ କଳାନିଧି ମାରନ ଓ ସନ୍ ଟିଭି ନେଟୱର୍କ ସିଇଓ କାଭେରୀ ମାରନଙ୍କ ଝିଅ। ସେ ୨୦୧୮ ମସିହାରୁ ସନରାଇଜର୍ସ ହାଇଦ୍ରାବାଦର ସିଇଓ ଭାବେ କାର୍ଯ୍ୟ କରୁଛନ୍ତି ଏବଂ ଭାରତୀୟ କ୍ରିକେଟ୍ ପ୍ରଶାସନର ଜଣେ ଚର୍ଚ୍ଚିତ ଯୁବ ମୁହଁ।

ଅନ୍ୟପଟେ ଅନିରୁଦ୍ଧ ରବିଚନ୍ଦର ଦକ୍ଷିଣ ଭାରତୀୟ ସିନେମାର ଅନ୍ୟତମ ସଫଳ ସଙ୍ଗୀତ ନିର୍ଦ୍ଦେଶକ। ତାଙ୍କ ସଙ୍ଗୀତ ନିର୍ଦ୍ଦେଶନାରେ 'ଜେଲର', 'ଲିଓ', 'ବିକ୍ରମ' ଓ 'କୁଲି' ଭଳି ଅନେକ ସୁପରହିଟ୍ ଫିଲ୍ମ ମୁକ୍ତିଲାଭ କରିଛି। ସନ୍ ପିକ୍ଚର୍ସ ସହ ତାଙ୍କର ବୃତ୍ତିଗତ ସମ୍ପର୍କ ଦୀର୍ଘ ଦିନର ହୋଇଥିବାରୁ ଉଭୟଙ୍କୁ ନେଇ ଚର୍ଚ୍ଚା ଆହୁରି ବଢ଼ିଛି।

ତେବେ ବର୍ତ୍ତମାନ ସୁଦ୍ଧା ଏହି ବିବାହ ଖବରର କୌଣସି ଅଧିକୃତ ପୁଷ୍ଟି ହୋଇନାହିଁ। ଉଭୟଙ୍କ ପକ୍ଷରୁ ଘୋଷଣା ନ ଆସିବା ପର୍ଯ୍ୟନ୍ତ ଏହାକୁ କେବଳ ଚର୍ଚ୍ଚା ଓ କଳ୍ପନାଜଳ୍ପନା ଭାବେ ଦେଖାଯାଉଛି।