କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ ସୋମବାର ଭାରତୀୟ ଭାଷାର ବିକାଶ ଓ ପ୍ରୋତ୍ସାହନ ସହ ସାଂସ୍କୃତିକ ଜାତୀୟତାବାଦ ଉପରେ ଗୁରୁତ୍ୱାରୋପ କରିଛନ୍ତି। ଷଷ୍ଠ ସର୍ବଭାରତୀୟ ରାଜଭାଷା ସମ୍ମିଳନୀକୁ ସମ୍ବୋଧିତ କରି ସେ କହିଛନ୍ତି, ଭାରତର ସଂସ୍କୃତି ଓ ଇତିହାସ ସମ୍ପର୍କରେ ଜନସାଧାରଣଙ୍କ ମଧ୍ୟରେ ସଚେତନତା ବଢ଼ାଇବା ସାଂସ୍କୃତିକ ଜାତୀୟତାବାଦର ଏକ ମୁଖ୍ୟ ଉଦ୍ଦେଶ୍ୟ।

ଶାହ କହିଛନ୍ତି, ଦେଶର ବିଭିନ୍ନ ଭାଷାର ସ୍ୱର ଅଲଗା ହୋଇପାରେ, କିନ୍ତୁ ଜାତୀୟ ଭାବନା ଓ ଭାରତୀୟତା ସମାନ ରହିବା ଉଚିତ। ଜଣେ ଶିଶୁ ନିଜ ଦେଶ ଓ ସଂସ୍କୃତିକୁ ମାତୃଭାଷା ମାଧ୍ୟମରେ ଅଧିକ ଭଲ ଭାବରେ ବୁଝିପାରେ ବୋଲି ସେ ମତ ଦେଇଛନ୍ତି।

ଭାରତୀୟ ଭାଷାଗୁଡ଼ିକର ବିକାଶ ଓ ପ୍ରୋତ୍ସାହନ ପାଇଁ ରାଜନୈତିକ ମତଭେଦକୁ ପଛରେ ପକାଇ ସମସ୍ତେ ଏକାଠି କାମ କରିବା ଆବଶ୍ୟକ ବୋଲି ଶାହ ଆହ୍ୱାନ ଦେଇଛନ୍ତି।

ମହାରାଷ୍ଟ୍ରର ବହୁଭାଷୀ ସଂସ୍କୃତିର ଉଦାହରଣ ଦେଇ ସେ କହିଛନ୍ତି, ଏଠାରେ ମରାଠୀ, କୋଙ୍କଣୀ, ଗୁଜରାଟୀ, ସିନ୍ଧି, ହିନ୍ଦୀ, କନ୍ନଡ ଓ ୱାର୍ଲି ଭଳି ଅନେକ ଭାଷାର ବ୍ୟବହାର ହୁଏ। ମରାଠୀକୁ ଶାସ୍ତ୍ରୀୟ ଭାଷାର ମାନ୍ୟତା ମିଳିଥିବା କଥା ମଧ୍ୟ ସେ ଉଲ୍ଲେଖ କରିଛନ୍ତି।

ରାଷ୍ଟ୍ରୀୟ ଶିକ୍ଷା ନୀତି (NEP) ଅଧୀନରେ ମାତୃଭାଷାରେ ଶିକ୍ଷା ଏବଂ ଅନ୍ୟ ଏକ ଭାରତୀୟ ଭାଷା ଶିଖିବାର ବ୍ୟବସ୍ଥାକୁ ନେଇ ମଧ୍ୟ ଶାହ ମତ ରଖିଛନ୍ତି। ମାତୃଭାଷା ବ୍ୟତୀତ ଅନ୍ୟ ଏକ ଆଞ୍ଚଳିକ ଭାଷା ଶିଖିବାକୁ ବିରୋଧ କରିବା ଏକ ବଡ଼ ଭୁଲ ବୋଲି ସେ କହିଛନ୍ତି।

ସେହିପରି ହିନ୍ଦୀକୁ ଅନ୍ୟ ଭାରତୀୟ ଭାଷାର ପ୍ରତିଦ୍ୱନ୍ଦ୍ୱୀ ଭାବେ ନୁହେଁ, ବରଂ ଭାଷାଗୁଡ଼ିକୁ ଯୋଡ଼ିବାର ଏକ ମାଧ୍ୟମ ଭାବେ ଦେଖିବାକୁ ଶାହ ପରାମର୍ଶ ଦେଇଛନ୍ତି। ଏହି ଅବସରରେ ‘ବନ୍ଦେ ମାତରମ୍‌’କୁ ଏହାର ପୂର୍ଣ୍ଣ ଗୌରବ ଓ ସମ୍ମାନ ଫେରାଇବାକୁ ଦେଶକୁ ଦୀର୍ଘ ସମୟ ଲାଗିଥିବା କଥା ମଧ୍ୟ ସେ କହିଛନ୍ତି।