ମୁମ୍ବାଇ: ସାଉଥ ସୁପରଷ୍ଟାର ଅଲ୍ଲୁ ଅର୍ଜୁନ ଏବଂ ବଲିଉଡର ଚର୍ଚ୍ଚିତ ନିର୍ଦ୍ଦେଶକ ଆଟଲିଙ୍କ ବହୁ ପ୍ରତୀକ୍ଷିତ ଫିଲ୍ମ 'ରାକା' (Raka) ଭାରତୀୟ ସିନେମାର ସବୁଠାରୁ ବଡ଼ ପ୍ରକଳ୍ପମାନଙ୍କ ମଧ୍ୟରେ ସ୍ଥାନ ପାଇବାକୁ ଯାଉଛି। ବିଭିନ୍ନ ରିପୋର୍ଟ ଅନୁସାରେ, ଫିଲ୍ମର ନିର୍ମାଣ ବଜେଟ୍ ପ୍ରାୟ ୧,୦୦୦ କୋଟି ଟଙ୍କା ହୋଇପାରେ। ତେବେ ନିର୍ମାତାଙ୍କ ପକ୍ଷରୁ ଏହାର ଅଧିକାରିକ ପୁଷ୍ଟି ହୋଇନାହିଁ।

ଫିଲ୍ମର କାହାଣୀ ଦୁଇଟି ଭିନ୍ନ ସମୟସୀମାକୁ ନେଇ ଗଢ଼ାଯାଇଛି। ଗୋଟିଏ ପଟେ ବୈଦିକ ଯୁଗର କାହାଣୀ ଥିବାବେଳେ ଅନ୍ୟପଟେ ବର୍ତ୍ତମାନ ସମୟର କାହାଣୀ ଦେଖିବାକୁ ମିଳିବ। ଏହି ଦୁଇ ସମୟକୁ ଯୋଡ଼ି ଏକ ଭିନ୍ନ ଧରଣର ସିନେମାଟିକ୍ ଅନୁଭବ ଦେବାକୁ ନିର୍ମାତାମାନେ ପ୍ରୟାସ କରୁଛନ୍ତି।

ଫିଲ୍ମରେ ଦୀପିକା ପାଦୁକୋନ ପୌରାଣିକ ସମୟରେ ମୁଖ୍ୟ ଚରିତ୍ରରେ ନଜର ଆସିବେ। ଅନ୍ୟପଟେ ମୃଣାଳ ଠାକୁର ବର୍ତ୍ତମାନ ସମୟର କାହାଣୀର ଗୁରୁତ୍ୱପୂର୍ଣ୍ଣ ଭୂମିକାରେ ଥିବେ। ଜାହ୍ନବୀ କପୁର ଓ ରଶ୍ମିକା ମନ୍ଦାନାଙ୍କ ନାମ ମଧ୍ୟ ଫିଲ୍ମ ସହ ଯୋଡ଼ାଯାଉଛି, ଯଦିଓ ଏନେଇ ଅଧିକାରିକ ଘୋଷଣା ହୋଇନାହିଁ।

ଅଲ୍ଲୁ ଅର୍ଜୁନ ଓ ଦୀପିକାଙ୍କ ବ୍ୟତୀତ ଚେମ୍ବନ ବିନୋଦ ଜୋସ୍, ଯୋଗୀ ବାବୁ ଓ ଫେମିନା ଜର୍ଜଙ୍କ ନାମ ମଧ୍ୟ ଷ୍ଟାରକାଷ୍ଟରେ ଚର୍ଚ୍ଚାରେ ରହିଛି।

ଏହାଛଡ଼ା ଶାହରୁଖ ଖାନଙ୍କ କ୍ୟାମିଓକୁ ନେଇ ସୋସିଆଲ ମିଡିଆରେ ବେଶ୍ ଚର୍ଚ୍ଚା ହେଉଛି। ଖବର ଅନୁସାରେ, ତାଙ୍କ ଅଂଶର ସୁଟିଂ ବିଦେଶରେ ହେବ। ତେବେ ଏନେଇ ମଧ୍ୟ ନିର୍ମାତାମାନେ କୌଣସି ଅଧିକାରିକ ସୂଚନା ଦେଇନାହାନ୍ତି।

ଫିଲ୍ମର ସଙ୍ଗୀତର ଦାୟିତ୍ୱ ସାଇ ଅଭ୍ୟଙ୍କରଙ୍କୁ ଦିଆଯାଇଛି। ତେବେ 'ରାକା' ର ମୁକ୍ତି ତାରିଖ ଏପର୍ଯ୍ୟନ୍ତ ଘୋଷଣା କରାଯାଇନାହିଁ।