ଭୁବନେଶ୍ୱର: ବାଲେଶ୍ୱର ଜିଲ୍ଲାରୁ ଉଦ୍ଧାର ହୋଇ ନନ୍ଦନକାନନ ପ୍ରାଣୀ ଉଦ୍ୟାନରେ ରଖାଯାଇଥିବା ୫ଟି ଶିଶୁ ଓରାଙ୍ଗଉଟାନଙ୍କୁ ନେଇ ଆସିଛି ନୂଆ ସ୍ୱାସ୍ଥ୍ୟ ଅପଡେଟ୍। ବୁଧବାର ସେମାନଙ୍କର ବିସ୍ତୃତ ସ୍ୱାସ୍ଥ୍ୟ ପରୀକ୍ଷା କରାଯାଇଛି। ଛାତି, ପେଟ ଓ ମୁଣ୍ଡର ଏକ୍ସ-ରେ ସହ ରକ୍ତ, ସିରମ୍ ଓ ଅନ୍ୟାନ୍ୟ ନମୁନା ସଂଗ୍ରହ କରାଯାଇଛି।

ପ୍ରାଥମିକ ହେମାଟୋଲୋଜି ପରୀକ୍ଷାରେ ଜଣେ ଓରାଙ୍ଗଉଟାନ ଶାବକଙ୍କଠାରେ ଗୁରୁତର ରକ୍ତହୀନତା ଏବଂ ଆଉ ଦୁଇଜଣଙ୍କଠାରେ ହାଲୁକା ରକ୍ତହୀନତା ଚିହ୍ନଟ ହୋଇଛି। ଏହାପରେ ଟେକ୍ନିକାଲ୍ କମିଟିର ପରାମର୍ଶ ଅନୁସାରେ ଶାବକମାନଙ୍କୁ ସପୋର୍ଟିଭ୍ ସପ୍ଲିମେଣ୍ଟ ଓ ଆବଶ୍ୟକ ଔଷଧ ଦିଆଯାଉଛି।

ମୈସୁର ଜୁର ଆସିଷ୍ଟାଣ୍ଟ ଡାଇରେକ୍ଟର ଡା. ଶଶିଧରଙ୍କ କହିବା ଅନୁସାରେ, ଶାରୀରିକ ପରୀକ୍ଷା ସମୟରେ ୫ଟି ଶାବକ ସାଧାରଣ, ସୁସ୍ଥ ଓ ସକ୍ରିୟ ଦେଖାଯାଇଥିଲେ। ତେବେ ରକ୍ତ ଓ ମଳ ନମୁନାର ବିଶ୍ଳେଷଣରୁ ରକ୍ତହୀନତା ସମ୍ପର୍କିତ ସମସ୍ୟା ସାମ୍ନାକୁ ଆସିଛି। ଅନ୍ୟାନ୍ୟ ପରୀକ୍ଷାର ଫଳାଫଳକୁ ମଧ୍ୟ ଅପେକ୍ଷା କରାଯାଉଛି।

ଅଧିକାରୀମାନଙ୍କ ଅନୁସାରେ, ୫ଟି ଓରାଙ୍ଗଉଟାନଙ୍କ ସ୍ୱାସ୍ଥ୍ୟ ବର୍ତ୍ତମାନ ସ୍ଥିର ରହିଛି ଏବଂ ସେମାନେ ନିୟମିତ ଭାବେ ଖାଦ୍ୟ ଗ୍ରହଣ କରୁଛନ୍ତି। ବିଶେଷଜ୍ଞଙ୍କ ପରାମର୍ଶରେ ସେମାନଙ୍କ ପାଇଁ ଖାଦ୍ୟ ତାଲିକା ପ୍ରସ୍ତୁତ କରାଯାଇଛି।

ଏହି ଓରାଙ୍ଗଉଟାନମାନଙ୍କ ମୂଳ ଉତ୍ପତ୍ତି ଜାଣିବା ପାଇଁ DNA ପରୀକ୍ଷା ମଧ୍ୟ କରାଯିବ। ଏଥିପାଇଁ ସଂଗ୍ରହ କରାଯାଇଥିବା ରକ୍ତ ନମୁନାର ପରୀକ୍ଷା ପାଇଁ ଉପଯୁକ୍ତ ଲାବରେଟୋରୀ ଚିହ୍ନଟ ପ୍ରକ୍ରିୟା ଚାଲିଛି। ଓରାଙ୍ଗଉଟାନ ଭାରତର ସ୍ୱାଭାବିକ ପ୍ରଜାତି ନୁହେଁ ଏବଂ ଏହି ୫ଟି ଶାବକ କିପରି ବାଲେଶ୍ୱରରେ ପହଞ୍ଚିଲେ, ସେନେଇ ତଦନ୍ତ ଜାରି ରହିଛି।