ଭାରତୀୟ ଗଣତନ୍ତ୍ର ଏବଂ ସାମ୍ବିଧାନିକ ପ୍ରତିଷ୍ଠାନଗୁଡ଼ିକୁ ନେଇ ୨୭ଟି ଦେଶର ୪୦୦ରୁ ଅଧିକ ଭାରତୀୟ ବଂଶୋଦ୍ଭବ ଛାତ୍ର, ଗବେଷକ, ଶିକ୍ଷାବିତ୍ ଓ ପୂର୍ବତନ ଛାତ୍ର ଏକ ମିଳିତ ବିବୃତି ଜାରି କରିଛନ୍ତି।‘Spare India from Anarchy’ନାମରେ ଜାରି ହୋଇଥିବା ଏହି ବିବୃତିରେ ଦେଶର ସାମ୍ବିଧାନିକ ପ୍ରତିଷ୍ଠାନ ଓ ଗଣତାନ୍ତ୍ରିକ ପ୍ରକ୍ରିୟା ଉପରେ ଜନସାଧାରଣଙ୍କ ବିଶ୍ୱାସକୁ ଦୁର୍ବଳ କରିପାରୁଥିବା ପ୍ରୟାସ ନେଇ ଚିନ୍ତା ପ୍ରକାଶ କରାଯାଇଛି।

ଏହି ବିବୃତିରେ ନିର୍ବାଚନ କମିଶନ ଏବଂ ଅନ୍ୟ ସାମ୍ବିଧାନିକ ପ୍ରତିଷ୍ଠାନକୁ ନେଇ ଚାଲିଥିବା ବିବାଦ ଓ ବିରୋଧ ପ୍ରଦର୍ଶନ ପ୍ରସଙ୍ଗରେ ମତ ରଖାଯାଇଛି। ହସ୍ତାକ୍ଷରକାରୀମାନେ ଅଭିଯୋଗ କରିଛନ୍ତି ଯେ କିଛି ମହଲରେ ନିର୍ବାଚନ ଫଳାଫଳକୁ ନେଇ ସନ୍ଦେହ ପ୍ରକାଶ କରିବା ଏବଂ ସାମ୍ବିଧାନିକ ପ୍ରତିଷ୍ଠାନ ଉପରେ ପ୍ରଶ୍ନ ଉଠାଇବାର ପ୍ରବୃତ୍ତି ବଢ଼ୁଛି।

ବିବୃତିରେ କୁହାଯାଇଛି ଯେ ସ୍ୱାଧୀନତା ପରଠାରୁ ଭାରତୀୟ ଗଣତନ୍ତ୍ର ଅନେକ ପରିସ୍ଥିତିରେ ନିଜର ସ୍ଥିରତା ଓ ଦୃଢ଼ତା ପ୍ରମାଣ କରିଛି। ସାମ୍ବିଧାନିକ ପ୍ରତିଷ୍ଠାନ, checks and balances ଏବଂ ଶାନ୍ତିପୂର୍ଣ୍ଣ କ୍ଷମତା ହସ୍ତାନ୍ତର ଭାରତୀୟ ଗଣତନ୍ତ୍ରର ମୁଖ୍ୟ ବୈଶିଷ୍ଟ୍ୟ ବୋଲି ସେମାନେ ଉଲ୍ଲେଖ କରିଛନ୍ତି।

ହସ୍ତାକ୍ଷରକାରୀମାନେ ଏହା ମଧ୍ୟ କହିଛନ୍ତି ଯେ ନିର୍ବାଚନ ଫଳାଫଳ ଅନୁକୂଳ ନ ହେଲେ ନିର୍ବାଚନ ପ୍ରକ୍ରିୟାର ସ୍ୱଚ୍ଛତା ଉପରେ ପ୍ରଶ୍ନ ଉଠୁଛି। ସେହିପରି କୋର୍ଟର ରାୟକୁ ନେଇ ନ୍ୟାୟପାଳିକାର ସ୍ୱାଧୀନତା ଉପରେ ମଧ୍ୟ ଟିପ୍ପଣୀ କରାଯାଉଥିବା ନେଇ ସେମାନେ ଚିନ୍ତା ପ୍ରକାଶ କରିଛନ୍ତି। ଭାରତୀୟ ସଶସ୍ତ୍ର ବାହିନୀକୁ ଦଳୀୟ ରାଜନୈତିକ ଚର୍ଚ୍ଚାରେ ଟାଣିବା ଉଚିତ୍ ନୁହେଁ ବୋଲି ମଧ୍ୟ ବିବୃତିରେ କୁହାଯାଇଛି।

ଡଃ ବି.ଆର୍. ଆମ୍ବେଦକରଙ୍କ ମତକୁ ଉଲ୍ଲେଖ

ବିବୃତିରେ ସମ୍ବିଧାନର ପ୍ରମୁଖ ସ୍ଥପତି ଡଃ ବି.ଆର୍. ଆମ୍ବେଦକରଙ୍କ ଚିନ୍ତାଧାରାକୁ ମଧ୍ୟ ଉଲ୍ଲେଖ କରାଯାଇଛି। ଗଣତାନ୍ତ୍ରିକ ମତଭେଦର ସମାଧାନ ପାଇଁସାମ୍ବିଧାନିକ ପଦ୍ଧତିକୁ ଅନୁସରଣ କରିବାଆବଶ୍ୟକ ବୋଲି ହସ୍ତାକ୍ଷରକାରୀମାନେ ଜୋର ଦେଇଛନ୍ତି। ଅରାଜକତାକୁ ସମାଧାନର ବିକଳ୍ପ ଭାବେ ଗ୍ରହଣ କରିବା ଗଣତାନ୍ତ୍ରିକ ବ୍ୟବସ୍ଥା ପାଇଁ କ୍ଷତିକାରକ ହୋଇପାରେ ବୋଲି ସେମାନେ ଆଶଙ୍କା ବ୍ୟକ୍ତ କରିଛନ୍ତି।

ତେବେ ବିବୃତିରେ ଏହା ମଧ୍ୟ ସ୍ୱୀକାର କରାଯାଇଛି ଯେଅସମ୍ମତି ଓ ବିରୋଧ ଗଣତନ୍ତ୍ରର ଅବିଚ୍ଛିନ୍ନ ଅଂଶ। କିନ୍ତୁ ମତଭେଦର ସମାଧାନ ସଂସଦ, ନ୍ୟାୟପାଳିକା ଓ ଅନ୍ୟ ସାମ୍ବିଧାନିକ ମାଧ୍ୟମ ଜରିଆରେ ହେବା ଉଚିତ୍ ବୋଲି ହସ୍ତାକ୍ଷରକାରୀମାନେ ମତ ଦେଇଛନ୍ତି।

୨୭ ଦେଶରୁ ହସ୍ତାକ୍ଷର

ଏହି ବିବୃତିରେ ହସ୍ତାକ୍ଷର କରିଥିବା ଭାରତୀୟ ବଂଶୋଦ୍ଭବ ବ୍ୟକ୍ତିମାନେ ଆମେରିକା, ବ୍ରିଟେନ୍, କାନାଡା, ଅଷ୍ଟ୍ରେଲିଆ, ଜର୍ମାନୀ, ଫ୍ରାନ୍ସ, ଜାପାନ, ସିଙ୍ଗାପୁର, ଦକ୍ଷିଣ କୋରିଆ ଓ ଅନ୍ୟାନ୍ୟ ଦେଶରେ ରହୁଛନ୍ତି କିମ୍ବା ଅଧ୍ୟୟନ କରିଛନ୍ତି।

ହସ୍ତାକ୍ଷରକାରୀମାନଙ୍କ ମଧ୍ୟରେMIT, Oxford, Cambridge, Harvard, Yale, Stanford, Princeton, Columbia, London School of Economics ଏବଂ University of Torontoଭଳି ପ୍ରମୁଖ ଶିକ୍ଷାନୁଷ୍ଠାନ ସହ ଜଡ଼ିତ ବ୍ୟକ୍ତି ଥିବା ରିପୋର୍ଟରେ କୁହାଯାଇଛି। ତେବେ ଏହି ଶିକ୍ଷାନୁଷ୍ଠାନଗୁଡ଼ିକର ନାମ ହସ୍ତାକ୍ଷରକାରୀଙ୍କ academic affiliation ଭାବେ ଉଲ୍ଲେଖ ହୋଇଛି; ସେମାନଙ୍କ ବିବୃତିକୁ ସମ୍ପୃକ୍ତ ବିଶ୍ୱବିଦ୍ୟାଳୟର ଆନୁଷ୍ଠାନିକ ସମର୍ଥନ ବୋଲି ଧରାଯିବ ନାହିଁ।

ଶେଷରେ ହସ୍ତାକ୍ଷରକାରୀମାନେ ସାମାଜିକ ଓ ରାଜନୈତିକ ଶକ୍ତିଗୁଡ଼ିକୁବିତର୍କ, ଆଲୋଚନା, ସଂଳାପ ଓ ସାମ୍ବିଧାନିକ ପଦ୍ଧତି ମାଧ୍ୟମରେ ମତଭେଦର ସମାଧାନକରିବାକୁ ଆହ୍ୱାନ କରିଛନ୍ତି।